वटपौर्णिमेनिमित्त होरायझन अकॅडमीत वटवृक्ष लागवड; पर्यावरण संवर्धनाचा दिला संदेश

नाशिक | प्रतिनिधी : वटपौर्णिमेच्या पवित्र आणि मंगलमय निमित्ताने मविप्र समाज संचलित होरायझन अकॅडमी, मखमलाबाद येथे पर्यावरण संवर्धनाचा संदेश देणारा प्रेरणादायी उपक्रम उत्साहात पार पडला. भारतीय संस्कृतीतील वटवृक्षाचे महत्त्व जपत शाळेत वटवृक्षाच्या रोपट्याची विधिवत पूजा करून त्याची लागवड करण्यात आली.

शाळेच्या मुख्याध्यापिका श्रीमती भाग्यश्री लाडोळे यांच्या मार्गदर्शनाखाली महिला शिक्षकांनी या उपक्रमात सहभाग घेतला. भारतीय संस्कृतीत वटवृक्षाला दीर्घायुष्य, समृद्धी, स्थैर्य आणि अखंड सौभाग्याचे प्रतीक मानले जाते. या परंपरेला पर्यावरण संरक्षणाची जोड देत शाळेने "झाडे लावा, झाडे जगवा" हा संदेश समाजापर्यंत पोहोचविण्याचा प्रयत्न केला.

यावेळी मुख्याध्यापिका श्रीमती लाडोळे यांनी विद्यार्थी, शिक्षक आणि पालकांनी पर्यावरण संरक्षणासाठी प्रत्येकाने किमान एक वृक्ष लावून त्याचे संगोपन करण्याचा संकल्प करावा, असे आवाहन केले. महिला शिक्षकांनीही वृक्षसंवर्धनाचे महत्त्व अधोरेखित करत पर्यावरणपूरक जीवनशैली स्वीकारण्याचा निर्धार व्यक्त केला.

या उपक्रमामुळे शाळेच्या परिसरात उत्साहाचे वातावरण निर्माण झाले. भारतीय संस्कृतीची जपणूक आणि पर्यावरण संवर्धनाचा सुंदर संगम घडवून आणणाऱ्या या उपक्रमाचे उपस्थितांनी मनापासून कौतुक केले.