भूमिपुत्रांचा स्वाभिमान की वास्तव? विकासकामांतील परप्रांतीय मजुरांवरून नव्या चर्चेला उधाण

अग्रलेख -; विनोद मिसाळ 

मुंबई : महाराष्ट्रात “भूमिपुत्रांना प्राधान्य” हा मुद्दा वेळोवेळी राजकीय आणि सामाजिक चर्चेचा केंद्रबिंदू ठरत असतो. मात्र दुसरीकडे राज्यातील मोठमोठ्या विकासकामांमध्ये परप्रांतीय मजुरांचे वर्चस्व असल्याचे वास्तवही समोर येते. याच पार्श्वभूमीवर सोशल मीडियावर एक विचारप्रवर्तक लेख चर्चेत आला असून “भूमिपुत्रांचा स्वाभिमान आणि वास्तव” या विषयावर नव्याने चर्चा सुरू झाली आहे.

लेखात रेल्वे मार्ग, महामार्ग, पूल, धरणे, उंच इमारती आणि शहरांच्या विस्तारासाठी परप्रांतीय मजुरांचे योगदान अधोरेखित करण्यात आले आहे. उन्हातान्हात, पावसात आणि जीव धोक्यात घालून काम करणारे बहुतांश मजूर हे इतर राज्यांतून आलेले असल्याचे नमूद करण्यात आले आहे.

त्याचवेळी “या भूमीवरील नोकऱ्या भूमिपुत्रांनाच मिळाल्या पाहिजेत” अशी मागणी करणाऱ्यांवरही प्रश्नचिन्ह उपस्थित करण्यात आले आहे. कठोर मेहनतीच्या आणि श्रमप्रधान कामांमध्ये स्थानिक युवक मोठ्या प्रमाणात का दिसत नाहीत, असा सवाल या लेखातून उपस्थित करण्यात आला आहे.

लेखात असेही म्हटले आहे की, अनेक परप्रांतीय कामगार आपले घरदार आणि कुटुंब सोडून कमी मजुरीत कठोर परिश्रम करत महाराष्ट्रातील शहरांच्या विकासात महत्त्वाची भूमिका बजावत आहेत. त्यांच्या श्रमाशिवाय विकासाची गती अशक्य असल्याचे मत व्यक्त करण्यात आले आहे.

भाषा, प्रांत आणि अस्मितेच्या नावावर राजकारण करणाऱ्यांवरही अप्रत्यक्ष टीका करण्यात आली आहे. “जर खरोखरच महाराष्ट्राचा आणि मराठी माणसाचा अभिमान असेल, तर प्रत्येक क्षेत्रात पुढे येण्याची तयारी असली पाहिजे — मग ते कार्यालयीन नोकरी असो किंवा बांधकामावरील श्रमाचे काम,” असे लेखात नमूद करण्यात आले आहे.

कोणताही व्यवसाय लहान नसतो आणि कोणतेही श्रम कमी दर्जाचे नसतात. समाज मेहनतीच्या बळावर उभा राहतो. त्यामुळे भाषेचा आणि भूमीचा अभिमान फक्त घोषणांमध्ये नसून कृतीतही दिसला पाहिजे, असा संदेश या लेखातून देण्यात आला आहे.