‘मिसिंग लिंक’ बंद... मग संकटात सापडलेल्या चालकांनी टोल का भरायचा? वाहनचालकांचा संताप

नाशिक ब्यूरो:

मुंबई-पुणे द्रुतगती मार्गावरील ‘मिसिंग लिंक’ प्रकल्पाच्या दुसऱ्या बोगद्याजवळ अचानक दरड कोसळल्याने या मार्गावरील वाहतूक तात्पुरती बंद करण्यात आली आहे. या घटनेमुळे दोन्ही बाजूंना वाहनांच्या लांबच लांब रांगा लागल्या असून अनेक वाहनचालक आणि प्रवासी तासन्‌तास महामार्गावर अडकून पडले आहेत.

या परिस्थितीत सर्वाधिक संतापाची बाब म्हणजे, मार्ग बंद असूनही वाहनचालकांकडून टोलची वसुली सुरू असल्याचा आरोप प्रवाशांनी केला आहे. अनेक चालकांना पुढे जाता न आल्याने परत फिरावे लागत असून, परतीच्या प्रवासातही पुन्हा टोल भरावा लागत असल्याची तक्रार त्यांनी केली आहे.

वाहनधारकांनी प्रश्न उपस्थित केला आहे की, जेव्हा महामार्गावरील सेवा उपलब्ध नाही, वाहतूक बंद आहे आणि प्रवाशांना इच्छित स्थळी जाता येत नाही, तेव्हा टोल वसुलीचा आधार काय? प्रशासनाने अशा परिस्थितीत टोल माफ करावा किंवा भरलेला टोल परतावा, अशी मागणी वाहनचालकांकडून होत आहे.

दरड कोसळल्यानंतर संबंधित यंत्रणांकडून मलबा हटविण्याचे काम सुरू असून, मार्ग सुरक्षित झाल्यानंतरच वाहतूक पूर्ववत केली जाणार आहे. तोपर्यंत वाहनचालकांनी पर्यायी मार्गांचा वापर करावा आणि प्रशासनाच्या सूचनांचे पालन करावे, असे आवाहन करण्यात आले आहे.

दरम्यान, टोल वसुलीबाबत संबंधित महामार्ग प्रशासन किंवा टोल व्यवस्थापनाकडून अधिकृत भूमिका अद्याप समोर आलेली नाही. मात्र, या प्रकारामुळे वाहनचालकांमध्ये तीव्र नाराजी असून टोल धोरणाबाबत प्रश्नचिन्ह निर्माण झाले आहे.