40°C पेक्षा अधिक तापमानाचा इशारा; नागरिकांनी उष्णतेपासून स्वतःचे संरक्षण करावे

नवी मुंबई प्रतिनिधी देवानंद शिंदे 

देशातील अनेक भागांमध्ये तापमानाने 40°C चा टप्पा ओलांडल्याने नागरिकांच्या आरोग्यावर गंभीर परिणाम होण्याची शक्यता निर्माण झाली आहे. वाढत्या उष्णतेमुळे उष्माघात, शरीरातील पाण्याची कमतरता तसेच इतर उष्णतेशी संबंधित आजारांचा धोका वाढला आहे.

तज्ज्ञांनी नागरिकांना पुरेसे पाणी पिण्याचा तसेच लिंबूपाणी, ताक, नारळपाणी यांसारख्या द्रवपदार्थांचे नियमित सेवन करण्याचा सल्ला दिला आहे. शरीरातील पाण्याचे प्रमाण संतुलित ठेवणे अत्यंत आवश्यक असल्याचे आरोग्य विभागाने स्पष्ट केले आहे.

दुपारी 11 ते 4 या वेळेत थेट उन्हात जाणे शक्यतो टाळावे. अत्यावश्यक कारणाशिवाय घराबाहेर पडू नये, असे आवाहन करण्यात आले आहे. बाहेर पडताना टोपी, छत्री, सनग्लासेस तसेच हलके आणि सुती कपडे वापरण्याचा सल्लाही देण्यात आला आहे.

उन्हाळ्यात जड, तेलकट आणि तिखट पदार्थ टाळून ताजे फळे, सॅलड आणि हलका आहार घेण्याचा सल्ला तज्ज्ञांनी दिला आहे. विशेषतः लहान मुले, वृद्ध व्यक्ती, गर्भवती महिला तसेच हृदय, फुफ्फुस किंवा किडनीच्या आजाराने त्रस्त असलेल्या व्यक्तींनी अधिक काळजी घेण्याची गरज असल्याचे सांगण्यात आले आहे.

वाहनात कोणालाही बंद करून ठेवू नये, कारण काही मिनिटांत वाहनातील तापमान धोकादायक पातळीवर पोहोचू शकते, असा इशाराही प्रशासनाने दिला आहे.

चक्कर येणे, अत्याधिक घाम येणे, मळमळ, गोंधळणे, त्वचा गरम व कोरडी होणे किंवा बेशुद्ध पडणे ही उष्माघाताची लक्षणे असू शकतात. अशी लक्षणे आढळल्यास त्वरित वैद्यकीय मदत घेण्याचे आवाहन प्रशासन आणि आरोग्य विभागाकडून करण्यात आले आहे.