विद्यार्थ्यांनी शाळेत साकारले विठू-रखुमाई; आषाढी एकादशीनिमित्त दिंडी महोत्सव उत्साहात

हिगोली प्रतिनिधी : भगवानराव मस्के

हिंगोली, दि. 27 (प्रतिनिधी) : औंढा नागनाथ तालुक्यातील माथा येथील रामदास आठवले विद्यालयात देवशयनी आषाढी एकादशीनिमित्त आयोजित करण्यात आलेला दिंडी महोत्सव भक्तिमय वातावरणात आणि मोठ्या उत्साहात साजरा करण्यात आला. विद्यार्थ्यांनी पारंपरिक वेशभूषेत सहभागी होत वारकरी संप्रदायाची संस्कृती, भक्ती आणि परंपरा जिवंत केली.

कार्यक्रमात विद्यार्थ्यांनी विठ्ठल-रखुमाईची आकर्षक वेशभूषा साकारली. विठ्ठल नामाच्या गजरात टाळ-मृदंगाच्या तालावर पावली भजन, फुगडी तसेच विविध सांस्कृतिक कार्यक्रम सादर करण्यात आले. संपूर्ण शाळा परिसरात वारकरी संप्रदायाचे भक्तिमय वातावरण निर्माण झाले होते.

विद्यार्थी, शिक्षक आणि शिक्षकेतर कर्मचारी यांनी दिंडीत उत्स्फूर्त सहभाग नोंदवत भक्तिरसाचा आनंद लुटला. या उपक्रमातून विद्यार्थ्यांना पंढरपूरच्या वारीची परंपरा, वारकरी संस्कृती आणि आषाढी एकादशीचे धार्मिक व सांस्कृतिक महत्त्व प्रत्यक्ष अनुभवता आले.

या प्रसंगी विश्वनाथ रोडगे, विश्वनाथ कराळे, गजानन जाधव, विजय कालवे, ईश्वर आंधळे, सुनील कुटे, प्रशांत बोराडे, अंकुश माटे, विजय कळासरे, संजय कुटे, भगवान मस्के, व्यंकटी हिवराळे, सुरेखा घुगे, शारदा पोटे, रावसाहेब घरजाळे, विशाल काळे, नंदकिशोर आघाव आणि मल्लिकार्जुन स्वामी यांच्यासह शिक्षक, शिक्षकेतर कर्मचारी आणि विद्यार्थी मोठ्या संख्येने उपस्थित होते.

उपस्थितांनी सांगितले की, अशा सांस्कृतिक आणि धार्मिक उपक्रमांमुळे विद्यार्थ्यांमध्ये भक्तीभाव, संस्कार, सामाजिक ऐक्य आणि भारतीय सांस्कृतिक परंपरेविषयी आदर निर्माण होतो. आषाढी एकादशीच्या निमित्ताने आयोजित करण्यात आलेल्या या दिंडी महोत्सवाने विद्यार्थ्यांना वारकरी परंपरेचा अनोखा अनुभव देत शाळेच्या परिसरात भक्ती आणि संस्कारांचे वातावरण निर्माण केले.